Возачите на мотори мора да носат заштни кациги и треба да ја контролираат брзината за да не дозволат таа да управува со нив, бидејќи бројот на несреќите е во постојан пораст, предупредуваат од полицијата.

Со моторот „дукати“ возев од Стар кон Нов Дојран. По новиот асфалт се движев со брзина од околу 100 километри на час. Несреќата се случи одеднаш. Не видов дека асфалтот завршува и почнува стариот пат. Со тркалото удрив во дупка, летнав со моторот и педесетина метри се лизгав по патот. Животот ми го спаси кацигата. Вака раскажува кичевецот Боби М. (26), кој лани преживеал несреќа во која поминал само со повреда на ногата. Вели дека имал вистинска среќа што сообраќајката завршила без сериозни последици за неговото здравје. Животот му го спасила кацигата, но и палтото од заштитниот костум, кој го носел без специјалните панталони.

Според МВР, бројот на сообраќајните несреќи во кои учествуваат мотоцикли и велосипеди со мотори секоја година се зголемува, како и бројот на повредените возачи и совозачи, а најголем број од настраданите немале кациги. Најчести причини за сообраќајките се поминување на црвено светло и пребрзото возење.

Квалитетна Заштитна опрема

Топлото време секоја година ги мами моторџиите на улиците, а особено актуелни се скутерите, кои граѓаните масовно ги купуваат. Сообраќајната полиција секојдневно интервенира поради мотоциклистите што им го сечат патот на автомобилите, не носат кациги или возат со брзина поголема од дозволената.

Експертите велат дека при пад од мотор е најважно да се избегне скршеница на черепот или други сериозни повреди на главата, а за тоа пресудна улога има кацигата. Носењето заштитни кациги го намалило процентот на смртоносните сообраќајки со мотори за 40 отсто, а на повреди за 72 отсто, тврди Светската здравствена организација (СЗО).

- Повеќето нови моторџии не купуваат заштитна опрема, а други набавуваат кациги, но често „забораваат“ да ги стават на глава. Казната за неносење на кацига изнесува 35 евра во денарска противвредност. Казна ќе плати и возачот, но и лицата кои се возат на моторот и не носат кацига. Малолетниците кои возат скутери најчесто купуваат евтини кациги само за да им „замачкаат“ очи на полицајците. Со тоа само заштедуваат пари, но при пад, таква кацига нема да им го спаси животот - вели Кузман Дамчевски, виш полициски советник за сообраќајни работи во МВР.

И продавачите на мотори велат дека секој што вози мотор не треба да жали пари за заштитната опрема, особено кацигите, бидејќи таа го спасува животот. Цените на кацигите од кинеско производство се движат од 1.000 денари па нагоре, а според искусните моторџии, најквалитетните, кои можат да спасат живот, чинат околу 1.000 евра.

Експертите за безбедност во сообраќајот предупредуваат дека за правилен избор на кацига, моторциклистот треба да ја проба кацигата поради различниот облик. Поскапите модели можат да се прилагодат со помош на додатните слоеви кои се во комплет со кацигата. Мотоциклистот треба да внимава и на внатрешниот материјал кој треба да биде пријатен и да не иритира. Најосетливи делови се слепоочниците и јаболчниците. Треба да се избегнува синтетиката и поставата да биде од памук или од свила. Кацигата мора цврсто да стои и не смее да биде лабава ако се мрда главата, но не треба ниту да ја притиска главата за да не дојде до главоболка-велат експертите.

- Кога температурите се високи, ми се заматува пластиката на кацигата и имам чувство дека ќе се онесвестам од жештина. Поради тоа избегнувам да ја носам, иако знам дека го прекршувам законот и го загрозувам сопствениот живот - раскажува Зоран К. (19) од Скопје.И искусните моторџии велат дека е важно да се купи квалитетна кацига.

- Возачот треба да внимава кацигата да не го намалува видното поле кога ќе ја заземе правилна положба на моторот. Визирите се важен дел на секоја кацига. Направени се од специјален материјал, а уште подобро е ако имаат поголем квалитет на оптиката. Надворешниот дел е заштитен со слој против гребаници, а внатрешниот дел не смее да се замаглува. Добрите визири не го „криват“ патот пред вас, а истите мора да се заменат кога ќе се изгребаат- сметаат моторџиите.

Недисциплинирани возачи

Од МВР предупредуваат дека иако управувањето со мотори и скутери има свои предности, повеќе треба да се внимава на негативностите.

- Возачите на мотори треба да ја контролираат брзината на движење и да не дозволат брзината да управува со нив. Да го следат брзиномерот додека се во сообраќај и да ги почитуваат сообраќајните знаци и знаците за ограничување на брзината на движење. Практиката покажува дека и многу искусните мотоциклисти возејќи брзо, во некои ситуации не успеваат да ја избегнат опасноста - вели Дамчевски.

Скопските сообраќајци велат дека во последниве години моторот стана статусен симбол на помладата генерација, но желба за покажување на мото-вештини покажуваат и поискусените сопственици на скутери, веспи, мотори и гломазни мотори.

Според полицајците, најопасни сообраќајници за моторциклистите се широките улици и булеварите во градовите по кои возат со брзина поголема од дозволената, при што не водат сметка за сопствениот и за животот на другите учесници во сообраќајот.

- Според законот за сообраќајот, возачот на велосипед со мотор е должен да се движи што поблиску до десниот раб на коловозот или по велосипедската патека ако има таква. Ако двајца или повеќе велосипеди со мотор се движат во група се должни да се движат еден по друг. Ако на патот има велосипедска патека, возачот на велосипед со мотор треба да се движи по десната велосипедска патека во однос на правецот на движењето на сообраќајот. Возачот на велосипед со мотор, може да се движи само по оние сообраќајни површини каде што е дозволено движење со такви возила и не смее да вози со брзина поголема од 25 километри на час. Казната за овие прекршоци изнесува 25 евра во денарска противвредност, односно ќе му се регистрираат 15 негативни бода на возачот- вели Дамчевски.

Казна од 25 евра ќе плати и возач на велосипед со мотор, мотоцикл, лесен трицикл, трицикл, на лесен четирицикл и на четирицикл ако ја намалува стабилноста на возилото и го попречува движењето на дугите учесници во сообраќајот, ги симнува рацете од управувачот или се придржува за друго возило.Скопјани сметаат дека малолетниците на мотори не водат сметка ни за својата ни за безбедноста на другите учесници во сообраќајот.

- Многу моторџии мислат дека возењето „веспи“ не е опасно. Не ги почитуваат сообраќајните правила и со скутерите возат како целата улица да е нивна. Не се поместуваат на страна кога автомобил ќе се обиде да ги претекне, туку се тркаат со нив - вели скопски таксист.

Даниела Вељановска
"Дневник "

Back To Top