Ја нарекуваат најтешката мото трка во Светот со право. На 13 дневниот тест натпреварувачите се тркаат помеѓу себе, со часовникот, со теренот, дождот, песокот, па дури и со самите себеси додеки го тестираат лимитот на своето тело.

Заради сето ова, не треба да не изненадува што голем број на врвни возачи не го завршија релито Дакар 2016. Всушност, сите што дојдоа до целната линија се победници, без разлика на која позиција завршија. Имајќи го сето ова во ум, разбирливо е зошто Тоби Прајс е човекот кој најмногу слави, откако дојде до првата победа на Дакар во својот втор настап на ова рели.

На подиумот се искачи уште еден возач на КТМ, Стефан Свитко. Словачкиот возач беше изненадување за сите откако ја освои втората позиција без да има поддршка од фабричкиот тим на КТМ. Тој успеа да победи на 10-та етапа, и да забележи топ 5 времиња на 9 од вкупно 13 етапи. Трикратниот Европски Ендуро шампион сигурно ќе го видиме повторно на Дакар, а доколку добие поддршка и од фабричкиот тим, барајте го на врвот од пиедесталот.

На третата позиција финишираше Пабло Квинтанила со својата Хускварна, успевајќи да ги помине Хелдер Родригез на Јамаха и Кевин Бенавидес на Хонда.