Денеска беше потврдено дека MV Agusta ги откупи своите акции кои претходно беа во сопственост на Mercedes AMG. Со овој договор, Германскиот бренд и официјално повеќе не е дел од Италијанската компанија за мотоцикли.
MV Agusta сега ќе биде контролирана од Џовани Кастилиони и семејството Сардаров. За фановите на брендот MV Agusta, ова претставува почеток на едно ново поглавје за Италијанската компанија.
Во случај да не сте во тек, сопственичата структура во MV Agusta е многу комплексна и содржи неколку нивоа.
„MV Agusta Motor S.p.A“ е компанијата која ги произведува прекрасните мотоцикли. На корпоративно ниво, таа е одделена од студиото за дизајн „Castiglioni Research Center“ и тркачката дивизија „MV Agusta Reparto Corse“.
Пред денешната информација, „MV Agusta Motor S.p.A“ беше во заедничка сопственост на „MV Agusta Holding Company“ и „Mercedes AMG“. „MV Agusta Holding Company“ пак е во сопственост на „ComSar Invest“ и „GC Holding“.
„ComSar Invest“ е инвестициски фонд кој е поддржан од групацијата „Black Ocean“ која пак е дел од фамилијата Сардаров. Слична е ситуацијата и со „GC Holding“ на Џовани Кастилиони.
Но после денешната вест, „MV Agusta Motor S.p.A“ е во 100 процентна сопственост на „MV Agusta Holding Company“. Од таму велат дека сега можат да се фокусираат на иднината која вклучува четири цилиндрична платформа.