Борбата за првото место на табелата во MotoGP шампионатот достигна ново ниво.

Борбата за првото место на табелата во MotoGP шампионатот достигна ново ниво на неизвесност во Херез откако победата која ја постигна Марк Маркез го искачи од четвртата позиција на првото место. Иако победата му донесе доволно поени, таа сепак не беше доволна за да го оддели од другите возачи. Шпанецот, сега не се бори само против долгогодишниот ривал, Андреа Довициозо туку и со возачот на Suzuki, Алекс Ринс. Тројцата возачи во моментов ги делат само три поени.

Во неделата, Маркез одлично го спроведе својот план и го искористи неискуството на возачите на Petronas Yamaha, Фабио Куартараро и Франко Морбидели кои стартуваа заедно со него од првиот ред. Иако победи со предност од само 1.6 секунди, Маркез вели дека е среќен со победата пред се поради пораката која ја испрати до неговите ривали.

„Среќен сум што победив но особено сум задоволен што победив на тој начин. Тоа и ми беше целта. После грешката која ја направив во Тексас сакав тука да победам на ист начин. Токму тоа и успеавме да го направиме.“

Но со предност од само еден поен на табелата, Маркез признава дека мора и на Ринс да гледа како на сериозен ривал.

„Уште за време на зимските тестирања знаев дека Ринс ќе биде во оваа позиција. Тој одлично ја стартуваше сезоната. Најголема предност му е тоа што се уште нема никаков притисок врз него. Секако дека тоа подоцна ќе се појави но во моментов може да биде среќен доколку заврши на третото место. Тој е уште еден ривал за титулата и заедно со Suzuki тие се подготвени за борба.“

Кон крајот на трката Ринс имаше неколку успешни круга кои ги оставија другите возачи далеку зад него. Но иако беше брз исто колку и Маркез кон крајот на трката, тој не можеше да направи ништо за да го стигне. Со ова уште еднаш се потенцираа работите кои тој мора да ги поправи.

Ринс вели: „Морам да бидам подобар за време на квалификациите. Но воопшто не е лесно да имате многу добро време. Морам да се обидам и да се подобрам. Трката беше навистина тешка а дополнително ги искомпликува работите фактот што стартував од третиот ред.“