Вториот ден од пред-сезонскиот тест кој се одржува на патеката Сепанг помина во знакот на подобрувањата на Јамаха, Маверик Вињалес забележа време од 1м 58.897с и се искачи на врвот на провизорната табела.

Вињалес и Јамаха се искачија на врвот на вториот ден од првиот официјален МотоГП тест за 2019 година. Вињалес ја завзема првата позиција истиснувајќи го сонародникот Ринс и тимот на Сузуки. Трето најдобро време забележа Џек Милер од тимот на Алма Прамак Рејсинг.

Денот започна со најбрз резултат од Роси, за потоа Довициозо и Крачлоу да го превземат водството од час во час. Времињата кои ги поставија возачите се навистина блиски, па доколку ја погледнете табелата ќе забележите дека 19 возачи се во разлика од 1 секунда, односно беа се додека Вињалес не извозе фантастичен круг во кој направи неверојатни -0.527 од најдоброто време на Ринс.

Лоренцо е единствениот возач кој недостасува на патеката, а Маркез кој беше најбрз на вчерашниот тест денеска одлучи да го одмори рамото и го прекина тестирањето додека беше на петтата позиција, до крајот на денот неговиот резултат беше осми.

Очекуваме подобрување на времињата од сите тимови во текот на утрешниот трет и последен ден од тестото на Сепанг.