Првата трка од новиот MotoE шампионат, која требаше да се вози во Херез на почетокот на мај, можеби нема да се одржи.

Првата трка од новиот MotoE шампионат, која требаше да се вози во Херез на почетокот на мај, можеби нема да се одржи поради големиот пожар кој се случи синоќа на патеката во Шпанија. За време на вториот тест од новата електрична серија изби пожар во заедничката гаража, а според првичните информации, можно е да се уништени сите 18 мотоцикли кои требаше да бидат дел од новиот шампионат.

Серијата требаше да започне заедно со првата MotoGP трка која се вози во Европа а потоа да продолжи и на патеките во Ле Ман, Заксенринг, Ред Бул Ринг и Мисано. Сепак, првите луѓе на шампионатот сега се во трка со времето за да ги подготват машините но и инфраструктурата за првата трка.

Покрај мотоциклите, според информациите, во пожарот тимовите загубиле речиси се што им е потребно меѓу кои и алат, компјутери како и опрема за возење. Една позитивна работа е дека нема ниту еден повреден.

Бидејќи овие мотоцикли се специјално направени, се сомневаме дека Италијанската компанија Energica ќе успее навреме да креира нови машини.

Вториот тест од серијата се одржа вчера на патеката во Херез. Најдобар беше Бразилецот Ерик Гранадо со време од 1:48.984. Овој резултат е за речиси една секунда подобар од времето кое го постигна Британецот Бредли Смит на истата патека во ноември. Смит вчерашниот тест го заврши на осмата позиција.

Во продолжение прочитајте го соопштението кое го испратија од Dorna:

„Пожарот во новоизградената гаража уништи поголем дел од работите кои им се потребни на тимовите од FIM Enel MotoE светскиот шампионат. Во моментов се уште се утврдуваат причините кои доведоа до пожарот. Наскоро ќе објавиме дополнителни информации за точната причина за пожарот како и тоа дали ќе има промени на календарот.“

https://www.facebook.com/MotorcycleNews/videos/251353698977153/