Марк Маркез - новата ѕвезда е родена

0

споделувања

Банерот е успешно зачуван: Напишано од: Motori.com.mk; 10 Ноември 2013

Марк Маркез по денешната трка во Валенсија стана најмладиот освојувач на МотоГП титулата, 20 годишниот возач на Хонда имаше неверојатна дебитантска сезона, со што собори уште еден рекорд стар 35 години.

2013-R18-Champ-Pic-2

Марк Маркез по денешната трка во Валенсија стана најмладиот освојувач на МотоГП титулата, 20 годишниот возач на Хонда имаше неверојатна дебитантска сезона, со што собори уште еден рекорд стар 35 години.

За оние кои не се запознаени со биографијата на шпанецот, ќе кажеме дека кариерата во тогашната класа до 125цц ја започна во 2008, но во 2010 го покажа својот талент кога извојува 10 победи и ја освои титулата. Незаборавен момент од таа сезона ќе остане трката во Есторил кога стартуваше од последната позиција, за на крајот да победи на трката. Следен чекор беше преминувањето во Мото2 класата, импресивното но агресивно возење стана карактеристично за Маркез, а првата сезона во Мото2 ја заврши на втората позиција, иако имаше шанси да ја освои и титулата. Затоа пак во 2012 тој не ја испушти шансата да покаже што знае, притоа ја освои титулата и си го визираше пасошот за во „Кралската“ класа.

2013-R18-RACE-Pic-1

2013 година за Маркез ќе остане запаметена по многу работи, почнувајќи од првата трка во Катар, па се до последната денеска на Валенсија. Од 18 трки тој заврши на подиумот на 16 од нив, на една имаше пад во момент кога беше на втората позиција, и на една беше дисквалификуван заради грешка на тимот. Шест победи, шест втори места и четири трети беа доволни за Марк Маркез на своето конто да прокнижи 334 бодови и да стане најмладиот шампион во историјата на МотоГП.

Низ текот на целата сезона тој импресионираше со својот стил на возење, фантастичните времиња кои ги постави и рекордите кои ги сруши беа само дел од приказната. Талентот е неспорен, иако фановите му забележуваа за агресивниот стил на возење, на крајот и директниот ривал за титулата Хорхе Лоренцо му подаде рака на својот помлад колега.

Маркез има харизма која ја има(ше) и Валентино Роси, од првата трка во МотоГП бројот на негови фанови постојано растеше, за сега слободно да кажеме дека новата ѕвезда во МотоГП е родена. Следната сезона сигурно ќе следиме возбудливи трки, а најдоброто светско натпреварување со мотори влегува во нова ера.

rossi-marquez

За крај и неколку факти за Маркез:

- Со 20 години и 266 дена стана најмладиот освојувач на МотоГП шампионатот до сега. Претходниот рекорд го имаше Фреди Спенсер кој во 1983 година ја освои титулата во класата 500цц со 21 година и 258 дена.

- Маркез е само четврти возач во историјата на МотоГП (65 години) кој има освоено титули во три различни категории. Претходно тоа им успеало на Мајк Хеилвуд, Фил Рид и Валентино Роси.

- Забележа рекорд во најголем број на подиуми (16) во дебитантскиот настап во МотоГП

- Рекорд во најголем број на пол позиции (9) во дебитанстки настап во МотоГП

- Го собори и рекордот од 1982 година на Фреди Спенсер за најмлад победник на трка и најмлад возач кој стартувал од првата позиција. На Маркез тоа му успеа на втората трка во сезоната кога имаше 20 години и 63 дена.

- 334 бода е најголемиот број на поени кој ги собрал некој возач во дебитантската сезона во историјата на МотоГП.

Сите овие бројки покажуваат дека Маркез не случајно е новиот Светски шампион. Младиот шпанец веќе е прогласен за наследник на Дуан, Агостини, Роси... доколку продолжи во ист стил го очекува голема иднина и запишување во вечната листана МотоГП легенди.

2013-R18-Champ-Pic-1