Хорхе Лоренцо, возачот на Movistar Yamaha тимот во МотоГП шампионатот дојде до третата победа во низа на трката за Големата Награда на Италија која се возеше на патеката Муџело.

Хорхе Лоренцо, возачот на Movistar Yamaha тимот во МотоГП шампионатот дојде до третата победа во низа на трката за Големата Награда на Италија која се возеше на патеката Муџело.

Илјадници домашни фанови на легендарната патека Муџело ја прославија победата на Лоренцо, но и успехот на нивниот миленик Валентино Роси кој заврши на третата позиција. Успехот за Италијанците го надополни Андреа Јанон кој со своето Дукати дојде до втората позиција на трката на која стартуваше од пол позицијата.

Стартот на трката во која фаворитите не беа на посакуваните позиции (Роси на 8-та, Маркез на 13-та стартна позиција) донесе многу возбудувања, па така по првиот свиок Лоренцо се најде зад Јанон и Довициозо кои ветуваа многу за тимот на Дукати. Сепак до крајот на првиот круг Лоренцо покажа дека претходните две победи не се случајни, па така го превзема водството кое не го испушти до крајот на трката.

Првата позиција на Лоренцо беше загрозена единствено од Марк Маркез, кој и покрај тоа што имаше катастрофален резултат на квалификациите и трката ја започна од 13-та позиција, успеа да дојде до задното тркало на водечкиот Лоренцо. Шпанецот во тој момент покажа дека е сериозен кандидат за освојување на титулата, правејќи разлика која потоа беше недостижна за останатите возачи и мирно дојде до третата победа во низа.

Трката во Муџело секако ја одбележи и возењето на Маркез, возачот на Хонда тимот имаше фантастични перформанси и како воопшто да не му пречеше тоа што стартуваше од петтиот ред, па така за кусо време се вклучи во борбата за првите позиции, заедно со Јанон, Довицозо и Педроса. Сепак темпото кое го наметна и агресивното возење се покажа како погубно за него откако доживеа пад на само неколку круга до крајот, по што остана без бодови од трката во Муџело. Падот на Маркез значеше трета позиција за неговиот клубски колега Дани Педроса, се до моментот кога Валентино Роси успеа да го помине, а Педроса мораше да се задоволи со четвртата позиција.

Одличната трка во Муџело ги размрда работите во генералниот пласман, по трите последователни победи Лоренцо е сега само шест поени зад водечкиот Роси кој има 118 поени, на третата позиција се наоѓа Андреа Довициозо со 83, два повеќе од вториот возач на Дукати, Андреа Јанон. Марк Маркез е на петтата позиција во генералниот пласман со 69 поени по 6 извозени трки.

Следната трка се вози на 14 јуни на патеката Каталуња во Шпанија.